Skip to content

Þegar við komum með barnið í skólann á morgnana

Við skólann skapast ávallt hætta á morgnana þegar hundruð barna koma á sama tíma að skólanum. Þeim er ýmist ekið, þau koma gangandi eða á hjóli. Við viljum lágmarka slysahættu eins og mögulegt er. Það krefst þess að allir gæti fyllstu varúðar og fari eftir þeim leiðbeiningum sem skólinn sendir frá sér. Hér fyrir neðan eru leiðbeiningar sem allir eru beðnir um að lesa.

Göngum í skólann

Besta leiðin til að draga úr hættu vegna umferðarinnar er að draga úr umferðinni. Þess vegna beinum við þeim tilmælum til foreldra / forráðamanna að aka börnum sínum ekki í skólann nema brýna nauðsyn beri til og ganga í staðinn. Við mælum með því að foreldrar fyrstu bekkinga gangi með börnum sínum í skólann og kenni þeim í leiðinni hvað beri að varast og hver sé besta leiðin.

Ef nemendum er ekið í skólann eru ökumenn beðnir að hleypa þeim út við gangstéttarbrún en aka ekki inn á bílastæði.

Bílastæði starfsmanna

Bílastæðin norðan megin við skólann eru hugsuð sem stæði fyrir starfsmenn og þá sem eiga erindi í skólann. Foreldrar eiga alls ekki að aka inn á þau á morgnana þegar nemendum er ekið í skólann. Stæðið er lítið og þröngt og þar er dimmt á morgnana. Börnin skjóta sér milli kyrrstæðra bíla á leið í skólann og mikil slysahætta getur skapast.

Það er hins vegar í lagi að nota þessi stæði þegar fólk á erindi í skólann á miðjum degi og þegar börn eru sótt í frístund. Þá eru fáir á ferð nema þegar frímínútur eru. Þá skal að sjálfsögðu gæta fyllstu varúðar.